کانگریس کی کمان ملکارجن کھڑگے کے ہاتھ میں

۔ کانگریس کے نو منتخب صدر ملکارجن کھڑگے نے بدھ کے روز پارٹی کی باگ ڈور سنبھال لی۔ کانگریس ہیڈکوارٹر میں کھڑکے کی حلف برداری کی تقریب میں سابق صدر سونیا گاندھی، راجستھان کے وزیر اعلی اشوک گہلوت، سابق صدر راہل گاندھی، پرینکا گاندھی اور کئی سینئر لیڈران موجود تھے۔ کانگریس کی باگ ڈور 24 سال بعد غیر گاندھی خاندان کے ہاتھ میں چلی گئی ہے۔

حلف برداری کی تقریب میں الیکشن افسر مدھوسودن مستری نے اسٹیج پر ہی کھڑگے کو جیت کا سرٹیفکیٹ سونپا۔ اس دوران سونیا گاندھی نے کہا کہ کھڑگے کا عہدہ سنبھالنے پر وہ راحت محسوس کر رہی ہیں۔ انہوں نے کہا کہ اب کھڑگے صدر کے عہدے کی ذمہ داری سنبھالیں گے۔ انہوں نے کھڑگے کو بھی مبارکباد دی۔

قابل ذکر ہے کہ حلف برداری سے پہلے کھڑگے صبح راج گھاٹ پہنچے۔ انہوں نے بابائے قوم مہاتما گاندھی کی سمادھی پر گلہائے عقیدت پیش کئے۔ اس کے بعد وہ پنڈت جواہر لعل نہرو، راجیو گاندھی، جگجیون رام اور اندرا گاندھی کے مقبروں پر گئے اور انہیں خراج عقیدت پیش کیا۔ صدر کے عہدے کے انتخاب میں کھڑگے نے ششی تھرور کو شکست دے کر بڑے فرق سے کامیابی حاصل کی تھی۔