جسٹس ڈی وائی چندر چوڑ ملک کےنئے چیف جسٹس

جسٹس ڈی وائی چندر چوڑ ملک کے 50 ویں چیف جسٹس ہوں گے۔ صدر دروپدی مرمو نے آج جسٹس ڈی وائی چندر چوڑ کو اگلے چیف جسٹس کے طور پر مقرر کرنے کا وارنٹ جاری کیا۔ جسٹس ڈی وائی چندر چوڑ 9 نومبر سے اگلے چیف جسٹس کا عہدہ سنبھالیں گے۔

جسٹس ڈی وائی چندر چوڑ کے نام کی سفارش موجودہ چیف جسٹس یو یو للت نے اگلے چیف جسٹس کے طور پر کی تھی۔ جسٹس للت 8 نومبر کو ریٹائر ہو رہے ہیں۔ اہم بات یہ ہے کہ 7 اکتوبر کو مرکزی حکومت نے اگلے چیف جسٹس کے نام کے لیے چیف جسٹس یو یو للت سے سفارش مانگی تھی۔ جسٹس ڈی وائی چندر چوڑ دوسرے سینئر ترین جج ہیں۔ چیف جسٹس کے طور پر جسٹس ڈی وائی چندر چوڑ کی میعاد دو سال سے زیادہ ہوگی۔ وہ 10 نومبر 2024 کو ریٹائر ہو جائیں گے۔

جسٹس ڈی وائی چندرچوڑ نے دہلی کے سینٹ سٹیفن کالج سے اکنامکس میں بی اے آنرز کیا۔ انہوں نے دہلی یونیورسٹی سے ایل ایل بی کیا۔ جسٹس چندر چوڑ نے ہارورڈ لاء اسکول سے ایل ایل ایم کیا۔ بیرون ملک کئی یونیورسٹیوں اور لاء کالجوں میں لیکچر دے چکے ہیں۔ وہ امریکہ کی اوکلاہوما یونیورسٹی کے اسکول آف لاء اور ممبئی یونیورسٹی میں تقابلی آئینی قانون کے وزٹنگ پروفیسر رہ چکے ہیں۔انہوں نے بمبئی ہائی کورٹ اور سپریم کورٹ میں اپنی پریکٹس کی۔ انہیں جون 1998 میں بمبئی ہائی کورٹ میں سینئر ایڈوکیٹ کے عہدے پر فائز کیا گیا۔ وہ 1998 سے مارچ 2000 تک اے ایس جی رہے۔ انہیں 29 مارچ 2000 کو بمبئی ہائی کورٹ کا جج مقرر کیا گیا۔ 31 اکتوبر 2013 کو انہیں الہ آباد ہائی کورٹ کا چیف جسٹس مقرر کیا گیا۔ 13 مئی 2016 کو انہیں سپریم کورٹ کا جج مقرر کیا گیا۔ہندوستھان سماچار