لکھنؤ:لیواناہوٹل میں خوفناک آتشزدگی، چار کی موت

اتر پردیش کی راجدھانی لکھنؤ میں واقع لیوانا ہوٹل کی تیسری منزل پر لگی آگ میں اب تک چار افرادکی موت کی تصدیق ہو چکی ہے جبکہ 24 افراد کو بحفاظت باہر نکال لیا گیا ہے۔تفصیلات کے مطابق اطلاع ملتے ہی فائر بریگیڈ کی ٹیم پہنچ گئی اور ریسکیو آپریشن شروع کیا۔ تقریباً نو گھنٹے تک جاری رہے اس آپریشن میں چوبیس افراد کو بچا لیا گیا۔ ریسکیو کے دوران فائر بریگیڈ کا عملہ بھی آگ کی زد میں آگیا، ان کو علاج کے لیے سول اسپتال میں داخل کرویا گیا ہے ۔ حادثے کے وقت ہوٹل میں تقریباً 30 افراد موجود تھے۔ اس واقعے کے بعد وزیر اعلیٰ یوگی آدتیہ ناتھ اور نائب وزیر اعلیٰ برجیش پاٹھک زخمیوں کی عیادت کے لیے اسپتال گئے۔

وزیر اعلیٰ نے اس کا نوٹس لیتے ہوئے اسے معاملہ کی تفتیش کو ڈویژنل کمشنر اور پولیس کمشنر کے حوالے کر دیا۔ ڈویژنل کمشنر نے پورے معاملے کی چھان بین کے بعد ایل ڈی اے حکام کو ہدایت کی ہے کہ ہوٹل کو سیل کیا جائے اور قواعد کے مطابق گرانے کی کارروائی کی جائے۔ اس کے ساتھ اس میں ملوث اہلکاروں کے خلاف بھی کارروائی کی جائے۔ ہوٹل مالک کو حراست میں لے کر پوچھ تاچھ کی جا رہی ہے۔ ان کے خلاف حضرت گنج پولیس اسٹیشن میں ایف آئی آر بھی درج کی گئی ہے۔دو افراد ابھی تک لاپتہ ہیں

ضلع مجسٹریٹ کے دفتر سے جاری کردہ پریس بیان کے مطابق ہوٹل سے جن لوگوں کو بچایا گیا ہے ان میں شراون کمار، راجکمار، مونا، انش کوشک، کامنی، چندریش، آنند اپادھیائے، پردیپ موریہ، انوج گوئل، ابھیشیک شکلا، انکیت وشال، عمران جہاں، ابھیشیک شکلا، شریا تیواری، شیکھر، پروین گپتا، فرہین انصاری، شیوم اوستھی، سندیپ تیاگی، ایشان سریواستو، موہت اگروال، پی بی سنگھ، مہک ورما اور ایس خان شامل ہیں۔ اس کے ساتھ ہی مرنے والوں کی شناخت گرنور آنند اور صاحبہ کور، بوبی عرف امان غازی، شرویکا سنگھ کے طور پر ہوئی ہے۔ وہیں نینا تیواری کمرہ نمبر 314 میں اور اجول مشرا کمرہ نمبر 206 میں ٹھہری تھیں۔ دونوں افراد کے موبائل پر رابطہ کیا گیا تاہم کچھ پتہ نہیں چل سکا۔ ان سے رابطہ کرنے کے لیے پولیس نے دونوں نمبروں کے سی ڈی آر حاصل کر لیے ہیں۔دھوئے سے موت ہوئی

ریسکیو آپریشن ہیڈ مدن سنگھ نے بتایا کہ اس حادثہ کی اطلاع ملنے کے بعد جب وہ آٹھ بجے یہاں پہنچے تو دیکھا کہ پوری عمارت دھوئیں سے بھری ہوئی ہے۔ آگ لگنے کی جگہ نظر نہیں آ رہی تھی۔ دھوئیں کی وجہ سے آگ کے مرکز کو تلاش کرنا مشکل تھا۔ تمام اموات دھوئیں کی وجہ سے دم گھٹنے سے ہوئیں۔ آگ بعد میں کم ہوئی تو شیشے توڑ کر لوگوں کو باہر نکالا گیا۔ اندر پہنچنے پر معلوم ہوا کہ آگ پہلی منزل پر کچن سے لگی ہے، آگ زیادہ بڑی نہیں تھی لیکن دھویں نے صورتحال خراب کر دی۔ فائر بریگیڈ کے عملے نے تمام افراد کو باہر نکال کر اسپتال پہنچا دیا۔ پورے ہوٹل کو چیک کیا گیا ہے، وہاں کوئی اور نہیں پھنسا ہے۔

بلڈوزر کسی بھی وقت چل سکتا ہےایل ڈی اے سے موصول ہوئی اطلاع کے مطابق ڈویژنل کمشنر نے ہوٹل کا نقشہ پاس کرائے بغیر ہوٹل میں کاروبار کروانے میں ملوث افسران اور اہلکاروں کے خلاف کارروائی کا حکم دے دیا ہے۔ قواعد کے مطابق ہوٹل پر قبضے کے ساتھ ساتھ گرانے کی بھی ہدایات دی گئی ہیں۔ ہوٹل پر کسی بھی وقت بلڈوزر چلایا جا سکتا ہے۔