سونیا گاندھی راجستھان کے وزیر اعلی کے عہدے پر فیصلہ لے سکتی ہیں: وینوگوپال

کانگریس ہائی کمان راجستھان میں پیدا ہونے والے سیاسی بحران کے بارے میں مسلسل غورو فکر کر رہی ہے۔ کانگریس کے جنرل سکریٹری کے سی وینوگوپال نے جمعرات کو میڈیا کو بتایا کہ کانگریس کی عبوری صدر سونیا گاندھی ایک سے دو دن میں راجستھان کے وزیر اعلیٰ کے عہدے کے بارے میں فیصلہ لے سکتی ہیں۔

حالانکہ راجستھان کے وزیر اعلیٰ اشوک گہلوت نے آج سونیا گاندھی سے ملاقات کی اور ریاست میں پیدا ہونے والے افراتفری کے ماحول پر معافی مانگی، لیکن ذرائع کا کہنا ہے کہ ہائی کمان ابھی بھی راجستھان کے وزیر اعلیٰ کے عہدے پر غور کر رہی ہے۔ آج میڈیا سے بات کرتے ہوئے گہلوت نے یہ بھی واضح کیا کہ وہ پارٹی صدر کے عہدے کے لیے نامزدگی داخل نہیں کر رہے ہیں اور راجستھان میں سیاسی بحران سے غمزدہ ہیں۔

قابل ذکر ہے کہ ابھی تک یہ واضح نہیں ہے کہ گہلوت وزیر اعلی کے عہدے پر برقرار رہیں گے یا پارٹی کسی اور کو وزیر اعلی بنائے گی۔ جب گہلوت سے صحافیوں نے اس معاملے پر سوال کیا تو انہوں نے کہا کہ اس فیصلے پر حق کانگریس کی عبوری صدر سونیا گاندھی کا ہے، وہ جو بھی فیصلہ کریں گی وہ سب کو قبول ہوگا۔